HABA PEUINGAT

No comment 58 views
banner 160x600
banner 468x60

Geuhimpon le: H.M. Thamrin Z.

Ija sutra tabloe ngon meuh
Beuneung aneuh geubloe ngon pade
Tajak beutroh takalon beudeuh
Bek rugoe meuh saket hate

Di ateuh rumoh nyak manyum tika
Pineung muda di dalam bate
Tapike dilee raya laba
Teulah teuma hana gunale

Bak ie raya bek tatheun ampeh
Bak ie tarek bek tatheun bubee
Bek tameurakan ngon sipaleh
Hareuta habeh geutanyoe malee

Tajak koh trieng tapageue laot
Tacok siatot tapageue kuta
Tajak dikheue ingat u likot
Marit lam seupot beujaga jaga

Tajak bak teupin bak teugoh teugoh
Bek roh meugantoh bak reuleueng bangka
Tamarit keu gop bak teugoh teugoh
Bek roh geuteuoh ayah ngon poma

Leupah that sayang bintang muble ble
Hana deueh le oh ujeun raya
Meunyoe got budoe dengon pie
Geusayang sabe le wareh lingka

Mangat mangat boh pisang abien
Bu leukat boh drien laen lom rasa
Watee kaya ingat keu gasien
Wate meusikin bek ro ie mata

Tajak u gle tajak koh kayee
Panyang koh lhee paneuek koh dua
Barang gapheu buet tapikee dilee
Meunyoe ka malee keupheu lom guna

Bak nyang beu’o uteun pi luah
Bak simalah dakwa sabena
Meunghan tapateh poma deungon ayah
Barat ngon Timu bumoe seurapa

Meunyoe na tajak nanggroe Meureudu
Beuna ta eu seuneubok lada
Beuna tagaseh keu poma ngon du
Bek na sigitu leupah haba

Bek hai aneuk tameu rukok
Teuka cabok tutong ija
Bek tamarit meurudok rudok
Bek talok lok pheu nyang hawa

Meunyoe na tajak nanggroe Makah
Bak bineuh Ka’bah talingka-lingka
Oroe ngon malam tapujoe Allah
Supaya pantah tamong syeuruga

Geulumbang laot raya sileupah
Riyeuek bicah di mieng kuala
Meunghan tapubuet pane paidah
Meungtan payah panena laba

Meuheut tajak keudeh u Sabang
Tajeumeurang lam laot raya
Wate marit tatimang-timang
Bek meukoh reupang putoh syedara

Meujan-jan saket meujan-jan mangat
Meujan-jan nekmat meujan-jan bala
Sabab dek nyan rakan taingat
Wasit nasihat bak ureueng tuha

Meunyoe na tajak naggroe Meulaboh
Tajak beutroh Kuala Tuha
Adak tameungui ban laku tuboh
Adak tapajoh ban laku atra

Krueng Baru ie meusiwoe
Jeumatan beusoe peuneuget Cina
Watee kheun keu gob taingat keudroe
Laba ngon rugoe beuna takira

Asai phon luka bak geutah mancang
Asai phon meuprang bak peudeuh teuga
Asai phon dakwa bak tunggee utang
Asai phon reunggang bak bagi laba

Tajak u laot ta tarek pukat
Sidroe bak lamat sidroe bak kaja
Tangui tapajoh beuhimat-himat
Beuna ta ingat singoh ngon lusa

Aneuk cicem gle jipo u laot
Dicok le ungkot aneuk tanggiroe
Bak buet nyang jahe bek taikot
Bak buet nyang karot bek tapeutoe

Tajak u pasi ta kawe ungkot
Taboh peurambot beuneueng meutaloe
Beucarong aneuk tapawang laot
Beujeut tagot dayong keumudoe

Tameututo bek leupah leupah
Peulara lidah yoh goh meusingklet
Nyoe ka teubiet narit lam babah
Meunyoe ka leupah han ek le talet

Jitop ngon duroe asoe jeuet taplah
Jitop ngon lidah leupah that saket
Bek tasak jaroe dalam peuneuerah
Jaroe patah meudarah kulet

Wahe syedara bek leupah peugah
Nyoe le beurakah kayem that sulet
Bek ta cot buleuen ngon reunong patah
Hana paedah tanyoe meupalet

Lam gle Seulawah na gajah teumbon
Ungkong meuayon chong kayee raya
Lake bak Allah Aceh Nanggroe lon
Beuteudong hukum ban kheun agama

Takzem keu guree teume ijazah
Takzem keu nang bah teume hareuta
Takzem keu Nabi teume syufaat
Takzem keu Hadharat teume syeuruga

Meunyoe tajak-jak Nanggroe Meulaboh
Beuna tapiyoh Kuala Woyla
Ngon rakan sabat bek tameu putoh
Walaupun jioh saboh keutika

Hana keukai dum geutanyoe
Lam donya nyoe he bentara
Mita beukai beulanja tawoe
Bek that laloe he syedara

Oh trok ajai habeh langkah
Tinggai meugah tinggai kaya
Tinggai mideun keurajeun luwah
Yoh nyan teulah putoh asa

Dikutip dari buku: Haba ngon Panton, PLSM, Jakarta 2007

Email Autoresponder swadaya
No Response

Leave a reply "HABA PEUINGAT"