HIKAYAT ACEH SULTAN ISKANDAR MUDA (RAJA ACEH) DEUNGON RAJA JOHOR, RAJA MALAKA, RAJA ASAHAN, DAN PUTROE PAHANG

banner 160x600
banner 468x60
 Pengarang: Cek Wandy

SULTAN ISKANDAR MUDA

Assalamu’alaikum, kaum keurabah
Saleum siulah, lon bagi rata
Ulon meujangeun, di dalam kisah
Meuheut sileumpah, meutuleh rika

Siseun dua seun, kata lon olah
Walau pih susah, teutap lon coba
Sapue bek neukheun, rakan meutuwah
Walau hana pah, meu ato kata

Saboh hikayat, akan lon kisah
Masa seujarah, Iskandar Muda
Ata jameun that, meuhat lon papah
Bek gadoh marwah, pembela bangsa

Mula phon that-that, haba lon peugah
Raja yang meugah, dua saudara
Di johor teumpat, mula phon kisah
Raja yang gagah, awak nyan dua

Phon RAJA RADEN, nama yang meugah
Pemuda gagah, cukop setia
RAJA SI UJUT, pih saban gagah
Ureung sep juwah, keujam that raya

Nibak siuroe, Raja yang gagah
Kalheuh dipeupah, saboh reuncana
Raja dua droe, yang jithe meugah
Ngon aneuk buah, beuhô leumpah na

Negeri pahang, di keuneuk jajah
Putroe yang ceudah, sasaran raja
Meunyoe bit pahang, teubukti kalah
Putroe yang ceudah, keu raden sigra

Meunan keuh janji, si ujut peugah
Jadeh meunikah, awak nyan dua
Langsong terjadi, prang yang that parah
Rot laot luwah, di bagi teuntra

Ladom rot darat, pasukan gagah
Dikupong luwah, deungon senjata
Prang pih dahsyat, gawat sileumpah
Pahang ka kalah, hana le daya

Di putroe pahang, diculek bagah
Laju diseurah, pada sang raja
Lheuh nyan jiriwang, deungon meuriah
U johor arah, bak asai mula

‘Oh troh u Johor, raja yang gagah
Janji meu ubah, sidroe sang raja
Raja si Ujut, haba jibantah
Putroe phang ceudah, hanjeut meucuca

Keu Raja Raden, hanjeut ta seurah
Cocok sileumpah, kamoe nyoe dua
Harus ngon Ujut, putroe meunikah
Meunan dipeugah, akhe calitra

Dawa bin dawa, raja meutuwah
Hana meungalah, meusidroe raja
Sampoe jak mita, putusan yang pah
Supaya jeulah, bek jeut keudawa

Langsong u Acheh, jibeu’ôt langkah
Raja yang gagah, dua saudara
Karna di Acheh, raja that meugah
Adil sileumpah, akhlak mulia

Laju beurangkat, rot laot luwah
Ngon aneuk buah, ikot seureuta
Diputroe Pahang, hana dikubah
Jiba ngon gagah, ikot ngon raja

Menuju Acheh, seuramoe Mekkah
Langsong di singgah, u pulo ruja
‘Oh troh u Acheh, raja meutuwah
Geusambot bagah, le sultan raja

Di Raja Acheh, seunang sileumpah
Katroh meulangkah, dua droe raja
Deungon tujuan, jak proh masalah
Kiban keuh yang pah, meunurot raja

Abeh calitra, mandum masalah
Putusan yang pah, lhee uroe masa
Na sidroe mentri, haba geupeugah
Ngon raja gagah, dua saudara

Saboh tawaran, keu raja gagah
Langsong geupeugah, tanpa na paksa
Agama Islam, yue tamong bagah
cocok sileumpah, man dua raja

Raja si Ujut, laju jibantah
Yang mentri peugah, hana jisuka
Seudangkan raden, langsong jipeugah
Seumike yang pah, peureule masa

Lhee uroe lheuh nyan, sultan peujeulah
Putusan yang pah, keu dua raja
Nyan putroe pahang, keu raden jatah
Cocok sileumpah, awak nyan dua

Akhe awak nyan, hate meu ubah
Jitamong bagah, islam mandua
Teuma si ujut, ka jiek darah
Jiteuka marah, luar biasa

Han jiteurimong, yang sultan peugah
Bit keubit icah, keu sultan raja
Keudeuh u Johor, jiriwang bagah
Ngon mata mirah, that masam muka

Sabe si Ujut, mita masalah
Beungeh sileumpah, keu sultan raja
Akhe buet Raden, putroe geuserah
Keuraja gagah, iskandar muda

‘Oh lheuh nyan teuma, laju meunikah
Putroe yang ceudah, ka deungon raja
Raden pih sama, langsong meunikah
Cukop meriah, hate gembira

Ngon adek Sultan, Raden meunikah
Lagak sileumpah, putri ti jeumpa
Raja si Ujut, meutamah marah
Dendam meutambah, keu sultan raja

Ujut beurangkat, ngon hate marah
Ngon kapai gagah, armada raya
Langsong menghadap, ngon sultan gagah
Si ujut singgah, di pulo ruja

Di Raja Acheh, sambot le bagah
Si Ujut langkah, deungon armada
Dendam si Ujut, han jeut dikubah
Rata daerah, karu di mita

Ureung dirampok, rakyat tan salah
Rata wilayah, peugot peukara
Soe yang direumpok, barang jirupah
Keujam sileumpah, lage nyan cara

Di raja acheh, teuka geulisah
Ngon hate tabah, teutap meusaba
Bak raja raden, sultan geupeugah
Raden meutuwah, geuyue jak gisa

Balek u Johor, laju le bagah
Mangat masalah, bek jeut keuraya
Di raja raden, langsong meu bantah
Han ji bôt langkah, untuk jak gisa

Karna di Acheh, ureung tan juwah
Galak that leumpah, tinggai ngon raja
Lom pih di sinoe, Raden meunikah
Seunang sileumpah, hate gembira

Raja si Ujut, meutamah marah
Kajiek darah, meutamah teuga
Nyan gampong london, jitôt le bagah
Ngon apui mirah, ngon ube raya

Rakyat dirampok, barang dirupah
Hana dikubah, mandum diraba
Lheuh nyan si ujut, jiriwang bagah
Golom sit puwah, di dalam dada

‘Oh troh u johor, laen jiolah
Siap peukakah, alat seunjata
Siap alat prang, ngon aneuk buah
Acheh neuk jajah, lam seketika

Eungkot tangiroe, lam riyeuk bicah
Eungkot khan gapah, di mieng kuala
Pakhok lon gantoe, buhue lon ubah
Supaya jeulah, ujong calitra

‘Oh ban geutupue, ka uleh sultan
Muka ka masam, beungeh pih teuka
Langsong meupakat, raden ngon sultan
untuk menghadang, raja bahaya

Mandum di rakyat, peusapat rijang
Peugot alat prang, ngon kapai raya
Kaye raya that, kadeuh teupampang
Ci olah rijang, peugot armada

Lapan beuleun ka, wate berjalan
Seulusoe rijang, peugot armada
Kon saboh dua, kapai di sultan
Siribe macam, geu ilah daya

Kapai nyan teuma, untuk jak meuprang
Deungon pasukan, si ujut raja
Nyan CAKRA DONYA, nama gelaran
Yang dinamakan, ka oleh raja

Mandum daerah, jak kirem peusan
Surat geulayang, le sultan raja
Siap beubagah, mandum pasukan
Untuk jak meuprang, katroh bak masa

Teuma di suót, le putroe pahang
Keupada sultan, iskandar muda
Sigohlom neulanjot, nibak tujuan
Keu panglima prang, neupileh sigra

Lheuh nyan teuma lom, di putroe pahang
Haba di peusan, bak sultan raja
Meunyoe neu lewat, nanggroe asahan
Bek su meryam, sinan bahaya

‘Oh kalheuh putroe, jibi ngon saran
Beurangkat sultan, ngon mandum teuntra
Rot jalur darat, beurangkat sultan
Geu èk kapai prang, nibak kuala

Di jambu aye, geu ek di sultan
Deungon pasukan, siap seunjata
Langsong u pidie, bak phon sasaran
Geupiyoh rijang, di sultan raja

Panglima pidie, deungan pasukan
Menghadap sultan, lam seketika
Panglima pidie, siap kapai prang
meugabong rijang, ngon kapai cakra

Langsong beurangkat, laju lom sultan
Deungon pasukan, ube-be yang na
Troh u meureudu, geupiyoh rijang
Menghadap sultan, japakeh nama

Nibak japakeh, geu ceritakan
Bahwa di sultan, kana rencana
Ngon nanggroe johor, rencana meuprang
Kiban pakiban, jinoe hai teuma

Suót japakeh, bereh that sultan
Diulon tuan, seutuju teuma
Siap di ulon, deungon pasukan
meugabong rijang, ngon cakra donya

Langsong beurangkat, laju lom sultan
Jak cok pasukan, di samalanga
Mandum meusapat, rakyat ikotan
Meugabong rijang, rakyat ubena

Sambong laju lom, lam perjalanan
‘Oh troh peusangan, piyoh lom sigra
Lheuh musyawarah, sultan di sinan
Teuntra peusangan, ikot seureuta

Ka dua uroe, sultan di sinan
‘Oh lheuh nyan teuman, beurangkat raja
U jambu aye, gabong rombongan
Saweub di sinan, kasiap teuntra

Sigohlom beurangkat, mandum pasukan
taktik dalam prang, atô reuncana
Geupeuduk rapat, ka uleh sultan
Masalah muprang, yang terutama

Panglima pidie, geubi ngon saran
Keupada sultan, iskandar muda
Cocok sileumpah, keu panglima prang
Nyan MALEM DAGANG, hai tuanku raja

Dari meureudu, gopnyan troh datang
Taktik dalam prang, lam ule kana
Langsong seutuju, laju di sultan
Nyô MALEM DAGANG, jeut keupanglima

PANGLIMA PIDIE, raja tentukan
Ngon RADEN saban, cocok leumpahna
Jeut keupeudampeng, nyan malem dagang
Bantu dalam prang, atô reuncana

Teuma JAPAKEH, peunasehat prang
Cocok that rumbang, jeut keu ulama
Kabeh sang bereh, lam peulantikan
Japakeh rijang, membaca doa

Doa seulamat, yang geu bacakan
Mudah-mudahan, bekna sapeuna
‘Oh lheuh nyan teuma, mandum pasukan
Meusapat rijang, lam CAKRA DONYA

Di sultan raja, ngon putroe pahang
Geu ek ngon rijang, lam cakra donya
Langsong beurangkat, mandum pasukan
Arah tujuan, u timu teuma

‘Oh troh armada, teumpat asahan
Teuingat sultan, sinoe bahaya
Teuingat haba, dari putroe phang
Bek su meryam, deungon seunjata

Teuma di raja, neuk eu buktian
Haba putroe phang, meuneuk peunyata
Langsong di teuntra, peulheuh meryam
Amanah SULTAN, ISKANDAR MUDA

Laju jimusu, bunyi letupan
Deungon balasan, cukop that raya
Teuma geupiyoh, siat di sultan
Kapai geulansam, deungon igoe sa

Langsong troh laju, teuntra asahan
Menghadap rijang, nibak armada
Teuma di tanyong, maksud troh datang
Puetra tujuan, keunoe neu teuka

Sigra geujaweub, le malem dagang
Kamoe meuneuk prang, raja bahaya
Ngon raja johor, kamoe neuk lawan
Nyan keuh tujuan, rôt noe meuteuka

Dijaweub laju, teuntra asahan
Kamoe neuk lawan, uji teunaga
Ngon teuntra acheh, neuk tes kuatan
Siap kamoe prang, ubena teuntra

Langsong meupakat, laju le sultan
Ngon malem dagang, sidroe panglima
‘Oh lheuh meupakat, siap untuk prang
RAJA ASAHAN, meulawan teuma

Langsong mulai, dari asahan
Ditembak rijang, pue-pue yang na
Seurangan jibi, meumacam-macam
Sampe karap lham, nyan CAKRA DONYA

Rombongan ACHEH, deungon pasukan
Balah tembakan, deungon seunjata
Prang yang that dahsyat, ACHEH-ASAHAN
Ngon pertempuran, luar biasa

Langsong JAPAKEH, geubi ngon saran
Keu MALEM DAGANG, ngon cara-cara
Pasukan ACHEH, mendarat rijang
Ngon panglima prang, laju le sigra

Bak bineh pante, sare jimuprang
Dahsyat hana ban, luar biasa
Disurot laju le, teuntra asahan
Benteng bertahan, laju jimita

Ka siploh uroe, lam pertempuran
Taloe asahan, jiplueng meutaga
Lhee droe pimpinan, panglima muprang
Direubot rijang, istana raja

Permaisuri raja, teuma di tahan
ji peu ek sajan, dalam armada
Ngat ji meunyerah, raja asahan
Putroe tersayang, hana meuhoka

‘Oh teuntra acheh, dalam kapai prang
Raja asahan, barô jigisa
‘Oh ban jiteupue, ratu di tahan
Seudih hana ban, hate di raja

Na sidroe mentri, jibi ngon saran
Raja asahan, meunyerah sigra
Jak lake ampon, nyan kesalahan
Ateuh tindakan, ubena yang ka

Bak raja acheh, menghadap rijang
Buah-buahan, bek tuwoe neuba
Langsong beurangkat, raja asahan
Ngon mentri sajan, menghadap raja

U ateuh kapai, menuju rijang
Menghadap sultan, meuah dipinta
Meunyerah kalah, raja asahan
Han le meu ulang, lage yang ka ka

Di raja acheh, meurasa sayang
Ratu geupulang, keupada raja
Langsong dijaweub, keupada sultan
Teuntra asahan, neuk bersaudara

Siap dikamoe, teuntra asahan
Meutamong islam, man mandum teuntra
Teuma hai jinoe, lanjut lom sultan
U johor rijang, deungon armada

Panglima pidie, pimpinan meuprang
Meusapat rijang, ngon raden sigra
Teuma japakeh, ngon malem dagang
Nyan diasahan, le sementara

Na padum uroe, kapai berjalan
Troh lah sultan, dijohor tiba
Kuala johor, geupiyoh sultan
Peulheuh meryam, arah udara

Akan teutapi, sunyi hana ban
Hana balasan, keutanda-tanda
Raja si ujut, nibak masa nyan
Mita bantuan, di dalam guha

Karna si ujut, deungon tujuan
Jineuk jak seurang, acheh mulia
‘Oh ban jitupue, acheh troh datang
Beungeh hana ban, si ujut raja

Diteumpat guha, bagah diriwang
Dikeupong rijang, ubena teuntra
Laot ngon darat, kana pasukan
Siap menyerang, ngon sultan raja

Teuma ‘oh lheuh nyan, di malem dagang
Deungon pasukan, beurangkat sigra
Langsong beurangkat, dari asahan
Deungon kapai prang, mandum armada

Dilaot banang, meureumpok rijang
Deungon pasukan, si ujut raja
Teuma disinan, awaknyan meuprang
Ngon pertempuran, luar biasa

Langsong ji bithe, keupada sultan
Bahwa kana prang, di laot raya
Dilaot banang, teungoh diseurang
Dahsyat hana ban, seurangan teuka

Beurangkat teuma, laju di sultan
Deungon pasukan, ubena teuntra
Meutamah seru, lam pertempuran
Mandum ji meuprang, deungon seunjata

Teuma di Acheh, karap taloe prang
Hana le imbang, pasukan teuntra
Laju japakeh, meulake rijang
Bak sidroe TUHAN, doa geupinta

‘Oh lheuh meudoa, ka nibak TUHAN
Seumangat rijang, geubi keuraja
Man lhee panglima, seumangat datang
Hingga dalam prang, imbang lom teuka

Kana sibeuleun, lam pertempuran
Taloe ngon meunang, golom na tanda
Panglima pidie, nibak simalam
lumpoe troh datang, lam seketika

Sang-sang lam lumpoe, nibak malam nyan
ulon berenang, lam laot raya
Lheuh nyan sang hanyôt, dalam geulumbang
Laju tenggelam, hana muhoka

Nibak japakeh, geupeugah rijang
Seudeh hana ban, geu deungoe haba
Karna japakeh, cuba artikan
Karap troh datang, ajal jiteuka

‘Oh wate singoh, teungoh dalam prang
Dikapai lawan, dirapat sigra
Panglima pidie, keunong tembakan
Nyawong meulayang, lam seketika

Manyèt panglima, jipuwoe rijang
Keudeh asahan, lam sementara
Lheuh nyan jigisa, laju pasukan
Ikot dalam prang, lage biasa

Panglima pidie, digantoe rijang
Le JAPU INTAN, pahlawan jawa
Yang katrep that-that, bersama sultan
Jak bantu meuprang, ngon sultan raja

Seumangat acheh, meutamah garang
Ngon kekuatan, meutamah teuga
Deungon that gigeh, acheh meunyerang
Dahsyat hana ban, seurangan teuka

Akhe buet johor, taloe dalam prang
Mandum pasukan, jiplueng that teuga
Teuma si ujut, teutap meulawan
Mantong meunyerang, meumacam cara

Armada acheh, meurapat rijang
Deungon kapai prang, si ujut raja
Langsong meulompat, di malem dagang
Dalam kapai prang, si ujut sigra

Di raja raden, pih na ikotan
Di japu intan, ikot seureuta
Si raja ujut, menghadap rijang
Ngon malem dagang, adu teunaga

Di raja ujut, ngon malem dagang
Keubai dibadan, ureung nyan dua
Langsong bertarong, adu kuatan
Man dua saban, sama that teuga

Kana lhee uroe, wate berjalan
Leumoh dibadan, si ujut raja
Raja si ujut, rubah meutimphan
Buet malem dagang, laju le sigra

Laju dirante, si ujut rijang
Keudeh bak sultan, laju le diba
Raja si ujut, ka keunong tahan
Hana le lawan, hana le daya

RAJA MALAKA, ka laen macam
Dineuk bebaskan, si ujut raja
Ka dipeusiap, mandum alat prang
Untuk menghadang, adu seunjata

‘Oh ban troh lewat, armada sultan
Ditembak rijang, deungon seunjata
Langsong mendarat, laju pasukan
Ngon japu itan, siap siaga

Langsong ditupue, troh japu intan
Di ragap rijang, uleh malaka
Akhe jieh teuma, di japu intan
keunong tembakan, ajal troh teuka

Manyét di puplung, uleh pasukan
Langsong jiriwang, nibak armada
Di raja raden, ngon malem dagang
Siap pasukan, mendarat sigra

Menuju langsong, ikot dalam prang
Ngon pertempuran, lawan malaka
Mandum dikeupong, buet malem dagang
Deungon pasukan, gagah perkasa

Teuntra malaka, jisurot rijang
Jiplueng sep tajam, hana meuhoka
Acheh kuasai, benteng bertahan
Meupreh jiriwang, raja malaka

Lhee beuleun wate, sinan pasukan
Hana jiriwang, meusidroe teuntra
Pasukan aceh, beurangkat rijang
Deungon pasukan, mandum armada

Armada acheh, beuserta sultan
Nanggroe asahan, siat geugisa
Panglima pidie, yang gugur lam prang
Sinan kuburan, lam seumentara

Geupuwoe langsong, ka uleh sultan
U pidie rijang, geupiyoh teuma
Panglima pidie, yang gugur meuprang
Sinan kuburan, seulama-lama

Beurangkat teuma, laju lom sultan
Menuju rijang, u pulo ruja
Di kuala aceh, ka dipreh sultan
Meriah han ban, disambot raja

Langsong lah laju, di putroe pahang
Meupakat sultan, masok istana
Raja si ujut, laju ditahan
Lam keuadaan, meurante teuma

Sibeuleun wate, troh malem dagang
Menghadap rijang, ka deungon raja
Raja si ujut, meurante badan
Ka nibak sultan, peuhadap sigra

Teuma japakeh, geubi ngon saran
Meunyerah rijang, hai ujut raja
Raja si ujut, teutap bertahan
Walau dibadan, meurante baja

Akhe jieh raja, yang bi putusan
Si ujut rijang, dihukom sigra
Hukuman mati, raja jatuhkan
Keu raja keujam, yang meubahaya

Di malem dagang, melaksanakan
Peurintah sultan, iskandar muda
Tapi si ujut, keubai dibadan
Meuluka pih tan, deungon seunjata

Tapi si ujut, ka leumoh badan
Deungon pukulan, macam seunjata
akhe si ujut, dipeugah rijang
Bak malem dagang, ngon saboh cara

Kaye geureutoe, neumita rijang
Baro di badan, ulon nyoe luka
Langsong geumita, le malem dagang
Ngon sigoe hantam, nyawoeng binasa

Baro lah acheh, teunang pikiran
Rata kawasan, rakyat bahgia
Nanggroe acheh nyoe, makmu lah rijang
Bawah pimpinan, iskandar muda

Yang ka dibantu, le malem dagang
Deungon pasukan, gagah perkasa
Akhe jieh acheh, jadeh berkembang
Hana gangguan, mara bahaya

‘Oh noe keuh kisah, dile lon karang
Ta sambong rijang, di laen rika
Meunyoe na salah, dalam keunarang
Ngon hate lapang, meu’ah lon pinta.

Email Autoresponder swadaya
No Response

Leave a reply "HIKAYAT ACEH SULTAN ISKANDAR MUDA (RAJA ACEH) DEUNGON RAJA JOHOR, RAJA MALAKA, RAJA ASAHAN, DAN PUTROE PAHANG"